المدونخانة مدونة تهتم بكل المدونات

عامان على المدونخانة

2010-12-24T01:01:00.000-08:00

في 12-2009 طلبت من كل المدونين الذين شاركوني تجربتي الصحفية بصفحة المدونخانة التعليق على الصفحة وصدر عدد الجريدة حاملا آرائهم فيها ..
عامان من التشجيع والتعاون
عامان من صداقات ظهرت في حياتي بحق
عامان من العمل الصحفي الذي لم اجد صعوبة في العامل فيه مع المصادر
فمصادري في الصفحة انتم..وانتم من صنعتم المدونخانة..ومن ساهم في تطويرها واستمرارها
ومن اعاني في كثير من الاوقات على انجاز موضوعاتها

تمرالايام و الشهور سريعا وصرنا في ديسمبر 2010 ومر عام آخر على المدونخانة فشكرا جزيلا لكم
اسعدوتني حقا
وتعلمت منكم الكثير
شكراااااااااااااااااااااااااا
وسأسعد بتعليقاتكم وآرائكم للعام التالي
:)

عن الشائعات نتحدث

2010-03-26T12:42:00.000-07:00

بيقولوا فيه سفاح
؟؟
ايه ده بجد
معقول
ظهر فين ده
انباء عن وجود سفاح في المعادي
انباء عن دخوله احد الاحياء الراقية
اختفاء السفاح في ظروف غامضة
اسطورة السفاح الوهمية
ومن بداية الخبر لنهايته نسمع كلام كتير وكتير جدا عن شكل السفاح وطريقته في الهجوم على الضحايا
ومن كل خبر للتانيتلاقي الناس لازم تضفي من شخصيتها على الخبر
فممكن ميكونش شافه ولا حاجة انما يحكيلك وكأنه شافه وقعد معاه كمان
وقيس على كده حكايات كتير زي ازمة تلوث مية النيل اللى اتسببت في نفاذ زجاجات المياه المعدنية من السوق
وكان السبب ...اشاعة

اه وربنا اشاعة
بعيدا عن ان التلوث موجود بالفعل ومعدة المواطن المصري اعتادت عليه الا ان الشائعة قلقت ناس كتير جدا

ويمكن في نفس السنة انطلقت شائعة وفاه الريس اللي اتسببت في ازمة للصحفي ابراهيم عيسى وكان هيروح في الكازوزا

وبرغم من تأثير الشائعات من زمان اوي من ايام فيلم اشاعة حب الا ان التأثير زاد في الفترة الاخيرة ويمكن بقى اسرع بكتير
وده بفضل الانترنت
برغم من انه مليان مزايا الا انه ساعد في نشر الشائعات يمكن لان في اوقات كتير بننقل كلام منغير تأكد من صحته او يمكن لان عنصر السرعة غلب علينا ونسانا الدقة

تفتكروا فعلا الشائعات انتشرت بسبب الانترنت ومواقع زي الفيس بوك والتويتر
؟؟!!!!!!!

سنة حلوة يا مدونخانة

2009-10-30T20:07:00.000-07:00

ياااااااااااه
ايام قليلة جدا ونقرب من مرور عام على صدور صفحة المدونخانة
مش متخيلة انه بجد فات سنة بحالها ياااااااه لسه فاكرة اول موضوع واول محاولة واول حد اعرفه واول حد يقرا الصفحة واول تعليق
اول مرة احضر فيها لقاء واول مرة اعرف مدونين واكلمهم
حاجات كتير اوي حصلت ليا ولاول مرة في حياتي مع المدونخانة
منساش فضل ناس كتير عليا
بعد فضل ربنا سبحانه وتعالي
مساعده ومسانده استاذي العزيز شريف جلال رحمه الله
ومن بعده من ساندوني في الملحق من الاستاذ عصام الجمال والاستاذ محمد حسان واخواتي هبة ابو علم وايناس اسماعيل
مش ناسية وقفتكم جمبي ومساندتكم اللى لسه مستمرة
:)
التجربة عدى عليها سنة بما فيها من سلبيات وايجابيات وحابه اعرف ارائكم كلكم فيها
ولتكن كلمتكم هنا او في التوبك الخاص بمرور عام في الجروب كلمة تنشر في صفحة المدونخانة احتفالا بمرور عام عليها

الي كل المدونين الذين شرفت بالتحدث معهم والكتابه عنهم وعن مدوناتهم فاثروا المدونخانة واثروا فكري
شكرا لكم جميعا
شكرا على تعاونكم
شكرا على مساعدتكم
شكرا ع المساندة والدعم والدفع الذي رأيته منكم جميعا
....
شكرا لوجودكم في حياتي
...........................................
للي حابب يشارك في الموضوع ع جروب الفيس بوك من اللينك ده

http://www.facebook.com/topic.php?topic=12202&uid=49594394709

صور المدونخانة

2009-08-08T03:38:00.000-07:00

بعد ما كنت بحط صور المدونخانة على موقع الفيسبوك لاقيت ان الصورة مش بيظهر منها غير العناوين والمواضيع مش ظاهرة خالص
وعشان كده هحاول احط صور الصفحات اللى فاتت وياريت اللى يقراها ويقول رايه بكل صراحة
((:

وحشتوني

2009-07-03T14:41:00.000-07:00

ياااااااااااااه
بقالي كتير جدا بعيدة عن المدونة
بس خلاص بقا عدينا المشاغل
وعدنا مرة اخرى اهوو
جايين نقول كلام بقا مهم
الا هو ليه فيه مدونين بيقفلوا مدوناتهم مرة واحدة فجاة كده نلاقي المدونة مش موجودة او تتحول لمدونة سرية يعني مسموح الدخول لناس معينة بس فيها
وليه مدونات كتير جديدة كويسة وتعليقات القراء فيها قليلة اوي ساعات بتوصل صفر
؟؟؟؟؟؟؟

المدونخانة تطلب التعاون

2009-05-17T02:44:00.000-07:00

من فترة كده قريت عن امكانية انك تتربح من المدونة
والله يا جماعة لا اخفيكم سرا اني مكنتش اعرف ايتها حاجة عن الموضوع ده وحسيت ان ممكن اننا نعمل موضوع عن كيفية التربح من مدونتك في الصفحة
فايه رايكم اننا نفتح البوست لاي حد ممكن يقول كيفية التربح ونحاول نجمع معلومات كتير عم مثلا جوجل ادسينس وعن اي طريقة تانية ممكن من خلالها انك تكسب وانت بتدون
وسمحولي اني اقول المعلومات اللى قدرت اتوصلها لحد الان في الموضوع ده
خدمة جوجل ادسنس وهي خدمة مقدمة من جوجل وبتيح انك تحط اعلان جوا المدونة ولما الناس تدخل عندك ويدوسوا على ايقونة الاعلان دي بتكسب فلوس ساعتها بس انا ليسه معرفش الفلوس دي بتوصلك ازاى؟!!
فيه مواقع بتقول انك بتكسب عدد من السنتات واللى بتتجمع وممكن توصلك على حسابك البنكي الشخصي
وفيه ناس قالت ان الموضوع ده مبيجيش منه نتيجة حقيقية
على فكرة فيه مدونات زي مدونة "اربح" اصحابها مخصصينها لشرح كيفية التعامل مع الانترنت والتربح منه والمدونات دي بيكون فيها اعلانات كتير
يعني ده كده معلومة في السريع عن الموضوع ده فايه رايكم؟؟

مبادرة المدونين العرب لرفع الوصم عن المتعايشين مع مرض الأيدز

2009-04-28T02:11:00.000-07:00

تحديث مهم
المبادرة بقت يوم السبت 16 في مسرح روابط بوسط البلد
ياريت الكل يشارك

دعوة جديدة اطلقها مجموعة من المدونين لرفع الوصم عن مرضى الايدز، والحملة اتشجع ليها ناس كتير جدا
نص الرسالة اللى جاتني بيقول:
دعوة من ايناس لطفي صاحبة مدونة عايزة اتكلم لحضور
مبادرة المدونين العرب لرفع الوصم عن المتعايشين مع مرض الأيدز
في المركز الثقافي الدولي
بالدقي17شارع السد العالي امام مستشفي الشبراويشي
السبت – 2 مايو
من الساعة السادسة إلى الساعة العاشرة

الدعوة عامة

الضيوف :

مدونون من مصر والدول العربية

ممثل البرنامج الإقليمي للأيدز في الدول العربية التابع للبرنامج الإنمائي للأمم المتحدة UNDP/HARPAS

ممثل المركز الثقافي الدولي

إمام مسجد صلاح الدين بالمنيل الشيخ سيد صباح

الأب بولس سرور كاهن كنيسة مارجرجس بجزيرة بدران

إمام مسجد النور بالعباسية الشيخ أحمد تركي

الكاتبة الكبيرة نجلاء بدير

ممثلون لمنظمات حقوق إنسان مصرية ( ممثل المبادرة المصرية للحقوق الشخصية EIPR وغيرها )

الفقرات والمواضيع التي سيتم مناقشتها
الأيدز في المنطقة العربية

-معلومات عن الفئات الأكثر عرضة للإصابة بهذا المرض وطرق الوقاية منه.

شهادات حية لمتعايشين مع فيروس مرض الأيدز.

لقاء مع قادة دينيين ونظرة الدين لمرض الأيدز والمتعايشين معه.

حوار مفتوح مع بعض أعلام الفن والصحافة.

-مبادرة صراحة: مبادرة المدونين العرب في التجاوب مع مرض الأيدز – التاريخ والأهداف-عروض فيديو

المدونون العرب في قلب التجاوب مع مرض الأيدز
منذ عام 2008 وعدد من المدونين العرب من شتى الدول العربية يعملون في مجال التوعية بمرض نقص المناعة المكتسب والمعروف باسم الأيدز وذلك بالمشاركة مع البرنامج الإنمائي للأمم المتحدة وغيره من منظمات الأمم المتحدة وكذلك مع عدة جمعيات أهلية ومنظمات محلية .

وتهدف هذه الجهود الي تحقيق عدة أمور:

تعريف الناس بمرض الأيدز بعيدا عن الخرافات والاساطير وتوفير معلومات علمية وحقائق مثبته عنه
رفع الوصم الذي يلحق بالمتعايشين مع الفيروس من أجل مساعدتهم وحماية حقوقهم وتوفير الرعاية والعلاج لهم ومدهم بكل الدعم الذي يحتاجونه.

تعريف الجمهور بأن الدولة توفر الدواء مجانيا للمتعايشين وكذلك توفر أماكن بالمجان للفحص الطوعي والاستشارة .

تعريف الجمهور بأن علماء الدين الاسلامي والمسيحي يدعون المؤمنين الي احتضان المرضي ورعايتهم وعدم وصمهم وتوفير كل سبل المساعدة لهم .

التوعية بأساليب الوقاية من المرض وكيفية حماية الاشخاص من الاصابة به.

مدونون ومدونات تشارك/تدعم مبادرة صراحة وحقوق المتعايشين مع مرض الأيدز

أحمد شقير – مدونة حكاوي اخر الليل - مصر

حفصة زغموت – قطر

هاني جورج- مصر

شريف عبد العزيز -مصر

عصام حمود – الجزائر

نبيل أحمد – اليمن

عمرو عزت – مصر

رضوى أسامة – مصر

جاين لوميل – مصر

سعيد احجيوج – المغرب

مينا زكري – مصر

ماريان ناجي – مصر

بسمة موسى – مصر

صفاء سيد – مصر

منعم محمود – مصر

محمود عزت – مصر

إيناس لطفي – مصر

مش دول بس لا ده فيه ناس تانية كتير جدا هيشاركوا
انت كمان ممكن تشارك بحضورك وتقول رايك في الحملة دي

اخبار ...اخبار

2009-04-23T11:53:00.000-07:00

ايه رأيكم في الجزء الجديد الخاص بالاخبار اللى بقي موجود في الصفحة؟؟؟
يعني دي محاولة كده للتغيير في الصفحة
ايه رايكم فيها؟؟؟

النهارده قبضت يا جدعاااااااان

2009-04-05T20:16:00.000-07:00

ياااااااا جدعان انا قبضت

ولاول مرة في حياتي الصوحفية دي اقبض

والفرحة مش سيعاني

الفرحة نسيتني الرقم الكبييييييييييييييييير اوي اوي اوي

اللى اخدته

نخش بقا في المهم

وهو ايه الاحساس اللى الواحد حسه

مع اول مرتب

طبعا فرحانة جدا وجواية عيل صغير بمصاصة شغال تنطيط

لاول مرة في حياتي بتقالي

خدي تمن شغلك

ومجهودك

تعبك

نزولك وطلوعك

ياااااااااه

احساس حلو اوي يا ناس

كنت مستنياه من زمان اوي

يمكن من اول يوم ليا في الجرنال

كنت مستنية هيقولولي اول مرتب امتي

وبعد اول اعده اكتشفت السر الرهيييييييييييييييب

انتي متخرجة لازم نجربك 3 شهور

مرت 3 شهور من اكتوبر ومازال التجريب مستمرا

بس الحمد لله

اهو الجرب

احم احم

اقصد التجريب جاب نتيجه اهه

والحمد لله

بقت العيشة فل

------------------

حاجة مهمة لازم اقولها

حلو اوى ان الواحد يحب حد ويكتشف ان الحد ده حبه برضه

انا كنت بحب الاستاذ شريف الله يرحمه جدا بس كنت فاكرة اني بحبه عشان بستفيد منه علما وصحافة وكده

لكنه يكون مبادلني نفس الاحساس الابوي ده مكنتش متوقعاه كده

لما حد يبقي بيكلم على مرتبي يوم 30 يناير

ويكتب الورقة يوم 31 يناير الصبح، ويقول خلوها مفاجاه

ويقولي ايه رايك لو نعملك ورقة بخمسين كده

مش حلوين برضه

وتكون وفاته 31 يناير بليل

بجد مش عارفة اقول ايه

ربنا يرحمك

اد كده كنت مهتم بيا

وبمرتبي

واد كده كان شاغلك

يااااااااااااااااااااااااااا

بجد شكرا

شكرا

ودعائي ليك هيستمر

على اد ما انا فرحانة اني قبضت

كان نفسي اوي تكون اول اللى يهنوني

بس اقول ع حاجة انا حلمت بيك بتضحك

مش عارفة ده معناه ايه

بس اللى حسيته انك فرحان عشاني

مش عارفة هو الكلام موضح احساسي والا لا

بس هو ده اللى حسيته

وهو ده الى حبيت اقوله

وانا باشاركم اول قبض في حياتي

طبعا كلكم عاوزين حاجة حلوة بس اوعدكم بقا البوست الجاي

هههههههههه

اقصد القبض الجاي لان ده راح ع الاهل والاحباب

وحشتوووووووووووونى

2009-03-24T15:14:00.000-07:00

يااااااااااااه من زمان مجتش ولا علقتش بس الواحد عرف اد ايه المدونة دي بتخلق حالة غريبة اوي من الارتباط برغم من اني مش بقالي كتير ف الموضوع ده وبرغم من ان الموضوع بالنسبة لي مش تدوين جامد بس بجد وحشتيني يا مدونتي وكل الزوار برضه وحشوني
ندخل بقا ف الموضوع بصوا بقا يا شباب
فكرت ف طرح سؤال يكون تحقيق العدد الجاي
ان شاء الله
بنكلم فيه عن سؤال بسيط جدا
لو لم تكن مدونا لوددت ان تكون؟؟؟
ها عاوزة اعرف رايكم ايه
وممكن الواحد ارتباطه بالمدونة يخليه يقول انه لو لم يكن مدونا لود ان يكون مدونا؟!!
ها ايه اراءكم

حتى بعد كل ده

2009-02-16T04:24:00.000-08:00

دايما كنت بقول ان استاذ شريف الله يرحمه علمني وعمل معايا حاجات كتيرر اوي بس اللى مكنتش اعرفه ان بعد وفاته هيستمر جميله معايا باشكل ده
انا اول مرة يكون عدد التعليقات كبير اكتر من اي بوست وده كان البوست اللى فات واللى كان عشانه كمان ناس جديدة دخلت المدونة لاول مرة وده برضه من موضوعه كمان ناس كتير بقت متابعه الصفحة وبكم يقولولي رايهم فيها من بعد الموضوع ذاته
سبحان الله
مش بقولكم بجد
الراجل ده جمايله عليا ما بتنتهيش
ربنا يرحمك يا استاذ شريف
ويكرمك على كل اللى عملته معاناف الجرنال ومعايا بالخصوص
------------------------------------
نيجي بقا لموضوع تاني وهو ان لغة المدونات عاوزين نعمل موضوع عن اللغة دي
وازاي بقا للمدونات لغة خاصة بيها
بيقدروا يفهموا بعض من خلالها
عاوزاكم تقولوا تعليكم ايه عن لغة المدونات ومين شايف ان العامية افضل من الفصحى في الكتابة وايه رايكم في المدونات اللى بتكتب بالفرانكو اراب اللى هو عربي بحروف انجليزي وارقام
مستنية رايكم..........وشكرا لكل اللى شرفني بالزيارة

البقاء لله

2009-02-02T02:47:00.000-08:00

لم يدر بخلدي يوما ان اكتب هذا الكلام، فلم ادر ان الدنيا لن تسمح لي ولو للحظات ان افرح فيها او حتى احس ولو لبضع قليل من الوقت انها بدأت تتصالح معي وتخطب ودي بعد ان كانت دوما تعطيني ظهرها وتظهر لي وجهها العبوس

لم اتوقع منها ان تعود لعادتها بهذه السرعة توقعت منها ان تعوضني ولكنها دنيا فمهما كانت لن تكون الا دنيا

يوم السبت وبعد انجاز شغلي الخاص بالاسبوع الجديد في ملحق تيلي بيزنس الصادر مع جريدة العالم اليوم

وبعد ان اتعبت استاذي شريف جلال ومعاناته معي وقفاشاته التي لن انساها ومداعباته لجميع من حوله والتي تنبع من قلب طيب صاف لا غبار عليه

يقرأ موضوعا فيوافق ويقرأ اخر فيعدل عليه، وبين هذا وذاك يخرج لي ما بداخله من معلومات وخبرة صحفية وكانه اراد ان يعلمني كل ما تعلمه قبل فوات الاوان، ومع كل خطأ نحوي او اسلوبي يرشدني بطريق غير مباشر او مباشر الى الصح والي الافضل

كان يريدني صحفية على اكمل وجه

ثلاثه اشهر بالتمام والكمال امضيتها مع هذا الرجل الذي لا يمكنني ان اوصفه بكلمات، ويعجز قلمي عن رثاءه ، وما اصعب الفراق خاصة من احببناهم في الله وكانوا يحبونا دون سابق معرفة وساعدونا دون مقابل وعلمونا دون ان نشعر انهم مفارقونا

الموت حق حقيقة ندركها جيدا لكن ان تكون مفاجة بهذه الطريقة امر صعب فبعد انتهاء عملنا ودعني وقال:

"لي الحمد لله خلصت الشغل انا عاوز امشي بسرعة بقا عشان الحق الفرح يدوبك اجيب العيال وامهم واروح الفرح"

بهذه الكلمات ودعني وكانت اخر عهدي به، فبعدها بسويعات قليله كان قد لقي وجه رب كريم

فالجنة ونعيمها يا خير استاذ

يا خير معلم

يا خير اب

واللهم الهم اهلك الصبر والسلوان

وان كان الرسول صلى الله عليه وسلم قال:

"اذا مات ابن ادم انقطع عمله الا من ثلاث صدقة جارية او علم ينتفع بع او ولد صالح يدعو له"

صدق رسول الله صلى الله عليه وسلم

فاني وكل من معي بالجريدة سنكون خير اولاد يدعون لك دوما

وسيكون علمك الذي علمتنا اياه ينتفع به بإذن الله

وربنا يجعل الصدقة الجارية في ميزان حسناتك

اللهم امين

ممكن اللى يقرا الموضوع ده يدعي بالدعاء القادم بجد استاذ شريف يستحق الدعاء

لا اله إلا الله وحده لا شريك له . له الحمد وله الشكر وله الفضل وله الثناء الحسن يحيي ويميت بيده الخير وهو على كل شيء قدير . لا اله إلا الله لا نعبد إلا إياه مخلصين له الدين ولو كره الكافرون ولا حول ولا قوة إلا بالله . اللهم صلى الله على سيدنا محمد خاتم النبيين والمرسلين عليه افضل الصلاة أتم التسليم .

- اللهم يا رحمان الدنيا والآخر ورحيمهما ارحمنا وارحم أمة محمد رحمة كافة تغنينا عن رحمة من سواك

- اللهم اغفر لحيينا وميتنا وشاهدنا وغائبنا كبيرنا وصغيرنا

- اللهم من احييته منا فاحييه على الإسلام . ومن توفيته منا فتوفاه على الإيمان . اللهم ارحم ( المتوفى ) رحمة واسعة وتغمده برحمتك

- اللهم ارحمه فوق الارض وتحت الارض ويوم العرض عليك . اللهم قه عذابك يوم تبعث عبادك .

- اللهم انزل نورا من نورك عليه

- اللهم نور له قبره ووسع مدخله وآنس وحشته

- اللهم ارحم غربته وارحم شيبته

- اللهم اجعل قبره روضة من رياض الجنة . لا حفرة من حفر النار

- اللهم أغفر له وارحمه واعف عنه واكرم نزله

- اللهم ابدله دارا خيرا من داره . واهلا خيرا من اهله . وذرية خيرا من ذريته وزوجا خيرا من زوجه وادخله الجنة بغير حساب . برحمتك يا ارحم الراحمين

- اللهم انقله من ضيق اللحود ومن مراتع الدود الى جناتك جنات الخلود لا اله الا انت يا حنان يا منان يا بديع السموات والارض تغمد ( المتوفي ) برحمتك يا ارحم الراحمين

- اللهم ان كان ( المتوفي ) غير اهلا لوصول رحمتك فرحمتك اهلا لان تسعه

- اللهم اطعمه من الجنة واسقه من الجنة واره مكانه من الجنة وقل له أدخل من أي باب تشاء

- اللهم ان ( المتوفي ) في ذمتك وحبل جوارك فقه من فتنة القبر وعذاب النار وانت اهل الوفاء والحق فاغفر له وارحمه انك انت الغفور الرحيم

- اللهم ان ( المتوفي ) عبدك ابن عبدك يحتاج الى رحمتك وانت غني عن عذابه فارحمه

- اللهم وارزقه لذة النظر الى وجهك والشوق الى لقاءك

- اللهم ارجع نفسه اليك راضية مرضيه وادخله في جنتك مع عبادك الصالحين

- اللهم انت غني ونحن الفقراء فانت غني ونحن الفقراء فانت غني من عذابه فارحمه

- اللهم ان كان ( المتوفي ) من المحسنين فزد في حسناته وان كان من المسيئين فتجاوز عن سيئاته

- اللهم اجعل ذريته سترا بينه وبين نار جهنم

- اللهم اجعل ذريته ذرية صالحة تدعوا له بخير الى يوم الدين

- اللهم ادخله جنتك وكرمك جنات النعيم

- اللهم اني اسالك الفردوس الاعلى نزلا له

- اللهم وابني له بيتا في الجنة واجعل بملتقانا هناك

- اللهم واسقه من حوض نبيك محمد صلى الله عليه وسلم شربة هنيئة مريئة لا يظمأ بعدها ابدا

- اللهم واظله تحت عرشك يوم لا ظل الا ظلك ولا باقي الا وجهك . اللهم بيض وجهه يوم تبيض الوجوه وتسود وجوه اللهم يمن كتابه . اللهم وثبت قدمه يوم تزل فيها الاقدام . اللهم اكتبه عندك من الصالحين والصديقين والشهداء والاخيار والابرار . اللهم اكتبه عندك من الصابرين وجازه جزاء الصابرين .

- اللهم اني اسالك في هذه الساعة ان كان (المتوفي ) في سرور فزد في سروره ومن نعيمك عليه . وان كان ( المتوفي ) في عذاب فنجه من عذابك وانت الغني الحميد برحمتك يا ارحم الراحمين

- اللهم تقبل منه القليل وتجاوز عنه التقصير

- اللهم اجعل مرضه كفارة لجميع ذنوبه . واجعل آخر عذابه عذاب الدنيا

- اللهم اني اسالك باسمائك الحسنى وصفاتك العليا وباسمك الطاهر الاعظم ان تتقبل منا دعاءنا بقبول حسن وان تجعله خالصا لوجهك الكريم

- اللهم ثبته بالقول الثابت وارفع درجته واغفر خطيئته وثقل موازينه

- اللهم حاسبه حسابا يسيرا يامن هو ارحم من عباده بانفسهم ومن الام بولدها

- اللهم ان ( المتوفي ) في كفالتك وفي ضيافتك فهل جزاء الضيف الا الاكرام والاحسان وانت اهل الجود والكرم

- اللهم ان ( المتوفي ) في حاجة الى رحمتك وانت الغني في غنى من عذابه فارحمه

- اللهم حرم لحمه ودمه وبشرته عن النار

- اللهم استقبله عندك خال من الذنوب والخطايا واستقبله بمحض ارادتك وعفوك وانت راض عنه غير غضبان عليه

- اللهم افتح له ابواب جنتك وابواب رحمتك اجمعين

- اللهم اني اسالك يا حنان يا منان يا بديع السموات والارض يا ذا الجلال والاكرام

- اللهم اجعل ( المتوفي ) من الذين اذا احسنوا استبشروا

- اللهم اني اسالك يا ارحم الراحمين ان يكون ( المتوفي ) ممن بشر عند لموت بروح وريحان ورب راض غير غضبان

- اللهم يا باسط اليدين بالعطايا يا قريب يا مجيب دعوة الداع اذا دعاه يا حنان يا منان يا رب يا ارحم الراحمين يا بديع السموات والارض يا احد يا صمد اعطي ( المتوفي ) من خير ما اعطيت به نبيك محمد صلى الله عليه وسلم عطاء ماله من نفاد من مالك خزائن السموات والارض . عطاء عظيما من رب غظيم . عطاء ماله من نفاد عطاء انت له اهل عطاء يليق بجلال وجهك وعظيم سلطانك

- اللهم اغفر ( للمتوفي ) وارحمه عدد من قالها ويقولها القائلون من اول الدهر الى آخره عدد من احصاه كتاب الله واحاط به علمه واضعاف ذلك اضعاف مضاعفه وكل ضعف يتضاعف من ذلك مضاعفة ابد الابد ومنتهى العدد بلا أمد

باقي العدد

2009-01-23T17:55:00.000-08:00

اما ده بقا الحوار مع الجميلة سحر غريب
حماتي ملاك
الى جانب مدونة امل وتحقيق صغير عن المدونين الفلسطينيين

عدد المدونخانة الخميس 22 يناير

2009-01-23T17:46:00.000-08:00

يا ريت اعرف رأيكم ف العدد
انا هنزله جزء جزء
وعلقوا ع كل جزء براحتكم بقا
دي صورة العدد كامل بس حسيت انه مش هينفع يتقري قلت اجزئه بعد كده
فكده بقا هتلاقوا التحقيق الخاص باطفال المدونين

معذرة

2009-01-16T11:34:00.000-08:00

السلام عليكم
معذرة يا شباب
فقد اردت ان اخصص هذه المدونة فقط لعرض ما نعرضه بصفحة المدونخانة ولكني وبعد مرور 21 يوما على العدوان الاسرائييلي الغاشم على شعب فلسطين اردت ان اسجل بعض الكلمات تعبيرا عما يجول بخاطري وذهني من شعور تغلغل بل تمكن مني جعلني اتذكر كلمات اغنية محمد منير في "حدوتة مصرية" عندما قال:
لا يهمني اسمك ولا عنوانك ..لا يهمني لونك ولا ملادك..مكانك
يهمني الانسان ولو ملوش عنوان
ومن كل قلبي اقول
يا ناس يا ناس هي دي الحدوتة ...
حدوتة عربية
حدوتة عربية
بدعيلك يا فلسطين مهما كانت صعوبة ما يحدث ومهما كانت الظروف صعبة ومهما كانت الامال بعيدة ومهما كان النصر بعيدا فانني وكل محب لك يملؤنا الحب ونتدرع بالدعاء حتي يفك الله كربك فأملنا بربنا كبير ومتأكدين من انه لن يخذلك ولن يرضى بالظلم الواقع على اهلك.
تحية منى لكل المجاهدين في فلسطين ولشعبها اطفالا ونساءا وشيوخا ورجالا....

مبروووووووووووووووك

2009-01-07T07:56:00.000-08:00

مبرووك مبروك
يا ولاد انا فرحانة جدا لاني لقيت بالصدفة البحتة المحضة موقع اسمه ادعم
www.id3m.com
والموقع ده لقيته وبالصدفة البحتة المحضة برضوا عامل سكان لاول عدد طلع من المدونخانة اللي كان بتاريخ 20-11-2008 والحمد لله تسللت الى الموقع وفي الخباثة كده رحت هووووووووووووب
عملالكم كوبي من الصورة يلا بقا هيصواااااااااااا
ويا رب الموقع ده يعمل سكان لكل الاعداد لحسن انا مش عارفة بقا

العدد السنوي لتيلي بيزنس

2008-12-27T08:13:00.000-08:00

سلام عليكم
ازيكم يا شباب المدونخانة
بصوا بقا الاسبوع القادم ان شا ءالله هيكون احتفال بمرور سنة على ملحق تيلي بيزنس
وده المفروض عدد مهم جدا للجريدة لانه بيجمع اهم والموضوعات وينشرها
وبالنسبة لباب المدونخانة بقالنا حوالي 6 اعداد
عاوزينكم بقا تقولوا لينا ايه اهم الموضوعات من وجهة نظركم اللي ممكن نناقشها في المدونخانة وايه مقترحاتكم يلا بقا عاوزين الهمة

شكراااااااا

2008-12-26T15:41:00.000-08:00

هذا البوست معمول كشكر خاص للاستاذ/السيد عبد الرازق صاحب مدونة قلم رصاص على تصميمه الرائع للبانر الخاص بالمدونة
بجد الف شكر
ومعلش على التاخير في وضع الاعداد ولكن انتظروها قريبا

العدد الاول

2008-12-12T01:33:00.000-08:00

العدد الاول كان فيه كلمه تعريف عن المدونخانة كنت بقول فيها....

"المدونخانة" باب جديد نكتب فيه عن عالم التدوين واشهر المدونات الموجودة على شبكة الانترنت وكل ما يهمك من جديد في هذا العالم.
في البداية نقول لمن لا يعرف المدونات ان المدونة عبارة عن تطبيق من تطبيقات شبكة الانترنت، مثل صفحة في موقع ولكنها لا تحتاج الى تكلفة فهي خدمة مجانية متاحة على العديد من المواقع مثل موقع جيران" www.jeeran.com " ومدونتي " www.modawanati.com " وموقع"www.blogger.com" وغيرها من المواقع التي تتيح خدمة التدوين.
وتعد المدونات ابسط اشكال تطبيقات الانترنت نظرا لسهولة انشائها وتحديثها فهي صفحة ويب تظهر عليها تدوينات (مدخلات) مؤرخة ومرتبة ترتيبا زمنيا تصاعديا ينشر منها عدد محدد يتحكم فيه مدير أو ناشر المدونة، كما يمكن للقارئ الرجوع إلى تدوينة معينة بعد فترة عندما لا تعود متاحة في الصفحة الأولى للمدونة.
وفي مصر اشتهرت المدونات بصورة كبيرة بين الشباب نظرا لكونها اداه للتعبير عن انفسهم دون قيد او شرط، وبسبب تزايد اقبال الشباب على عالم التدوين اصدرت دار الشروق كتابا بعنوان "مدونات مصرية للجيب" وهو عبارة عن تجميع لاشهر الموضوعات المكتوبة في المدونات سواء كانت سياسية اجتماعية ثقافية...الخ.
وحقق الكتاب مبيعات كبيرة في مهرجان القراءة للجميع بسبب الاقبال على قراءة ابداعات الشباب الى جانب ان مؤلفوا الكتاب كان لهم جمهورهم من العالم التدويني من قبل.
وفي هذا الباب سنعرض لك كل جديد في عالم المدونات.. لنعرف ما الجديد في عالم التدوين
________________________________________________________________________________
نيجي بقا لمدونة لماضة اللي بدات بيها الموضوع وكتبت وقلت:
مدونة"لماضة" http://lamada.blobspot.com
لماضة..حين يتمرد الاطباء
وهي مدونة ل" مروة عامر" طبيبة امتياز، وشعارها يقول:
"لماضة في دمي وجايبالي الكلام.. يا ترى على حق والا على باطل"
وكتبت فيها تحت عنوان"كارت ارهاب"
"جميع الحقوق محفوظه للست الدكتورة لماضة والأجر على الله واللى هيلطش أي حاجه من المدونة بدون أذن هي ديته عسكري أمن مركزي ايده طارشه هيجيبه من قفاه وخلي بالك كمان أنا موقفه غفير على المدونة ومسجله كل كلمة فى الشهر العقاري يعني يا ويلك يا سواد ليلك وخصوصا ان والدي افوكاتو قد الدنيا يعني مناسبين الحكومة وقد أعذر من بعجر"
وبعد هذا الارهاب تنتقل مروة لكي تعرفنا على يومياتها في الكلية من خلال يوميات طالب والتي تحكي فيها عما تعيشه داخل كلية الطب منذ اول يوم وحتى الان.
ولم تكتف مروة بذلك فقط ولكنها تحدثت عن المشاكل التي تواجهنا في المجتمع وازمة العنوسة ومشاكل زواج اصحاب المهن الواحدة بصورة فكاهية جدا.
ولم تكتف بذلك ولكنها كتبت ايضا تحت عنوان"خليك رسمي" اكثر المصطلحات التي نستخدمها كمصريين مثل يا مزمازيل، يا حاجة، يا بيه ، يا افندي، يا اسطى، وغيرها من الصفات التي تلازمنا في كثير من احاديثنا.
ومن احدث التدوينات التي كتبتها لماضة او الدكتورة مروة، بعنوان هسهس كلية الطب
"بعد ما ربنا اكرمنا وخلصنا مرحلة التعليم الاكاديميه وبدأنا ندخل في دراسة التخصصات .. ونتخصخص ونتجرجر ونلفت قصدي نشفت * من روند * لروند – الترجمة اخر الصفحة - كانت بداية ظهور أول اعراض الهسهس عليا .. وده مرض الوسواس لطلبة كلية الطب المعروف .. بقت كل حاجه اخدها اطبقها على نفسي وعلى اللى في البيت .. يستاهلوا حد قالهم يطوعوني ويدخلوني طب لازم يشربوا من نفس المحلول
وبدأت اعراض المرض تتجلى سنه ورا سنه - مش اعلان بامبرز ده – كل ما ندرس تخصص امسك الكتاب من دول بأديا ورجليا – اصلها مش مجرد كتب دي جر شكل– واذاكر الاعراض واطبقها على كل اللى حواليا .. لو حد جاتله كحة ايه يمنع انها تكون بداية ربو ولا سُل من شرب الشيشه والتحشيشة.. ولو جاله اسهال يبقى الطاعون دخل مصر تاني
مش هطول عليكم هشهدكم وانتوا تحكموا
أول روند كان الرمد (دراسة امراض العين )
لماضة : بابا وريني عينك كده
بابا : مالها يا لماضة
لماضة : مش عارفه شيفاها بتحرقك
بابا : تصدقي فعلا حاسس انها حمرا
لماضة : دي فيها زي غيامة أبيض في أبيض كده انت شايفني كويس
بابا : اه بالأمارة انتي لابسه أخضر في أخضر
لماضة : طيب قولي ده كام
ماما : لماضة خدي نقيلي كام كباية الرز دول
لماضة : لا مش هقدر انقيه
ماما : ليه ان شاء الله
لماضة : عندي قصر نظر .. مش انتي طول النهار تقوليلي ربنا يوقف نموك .. اهو وقف كل النمو بما فيهم النظر .. يرضيكي النهارده اجي اكشف على الست في الروند
مش طايله العلامات اشاورلها عليها اضطريت يا ولداه زي الغلابه اجيب كرسي وأقف عليه .. وخليت ابنها يقف ورا الباب عشان محدش يقفشني واتفضح يقوم ابنها يقعد يضحك عليا ويسيب الباب .. وفجأه .. يدخل واحد زميلي من أطول طلبة الكليه
لماضة : يا فضيحتشي
زميلي : انتي بتعملي ايه فوق يا لماضة
لماضة : استر عليا الهي يستر عليك ..انا كنت بعدل الاريال بتاع الاشارات عشان الست تلقط معايا على طول واقيسلها النظر.. ده بدل ما تيجي تشاورلها انت وتعملك حاجه تقابل بيها ربنا مش كتر خيري اني بعمل فحص بضمير وبتصرف
عجبك كده يا ماما اهي بقت الايد قصيرة والعين كمان
روند الجلدية
بت يا زرزر انا استحميت امبارح 15 مره .. واتليفت 45 مره .. تصدقي طلعت لاقيت جسمي احمر وكأن جلدي مسلوخ .. تفتكري يكون عندي جرب ؟؟
خصوصا وانها عمرها ما حصلت إني آكل 17 باكو شوكولاته واهرش ..على طول بيجيلي اسهال بس .. شكلي اتعديت من الواد الجربان اللى كشفنا عليه امبارح
زرزر : يابنتي عشان يجيلك جرب لازم تفضلي حاضنه الواد مش اقل من شهر.. ومن غير ما تستحمي طول الشهر ده كمان .. كل ده عشان الواد ريل عليكي .. بس الرياله مبتنقلش العدوى لو كان تف بس تخافي ..
روند الطب الشرعي
ده بقى كنت ولا المحقق كولمبو في زمانه .. ماشية بالعدسة في ايد .. والاسلكي في ايد .. والختامة في رجل .. اي ضيف يدخل لازم يتعمله مسح بصمات من على الكباية .. - ده لو طلب شاي- و لو طلب قهوة يبقى ضروري قلب الفنجان .. اما بقى لو كان معزوم على غدا فده لازمله تحديد نسل .. وتحليل جيني .. وفيش وتشبيه .. وورقة يثبت فيها انه من خارج المحافظة .. عشان يكون ليه حق في العزومة..................باقي الموضوع هتلاقيه عند لماضة
_______________________________________________________________________________
مدونة عجائب اجتماعية "مدونة ساخرة جدا"
وبقول عنها:
عجائب اجتماعية احدى المدونات الساخرة اشتهرت مؤخرا بين المدونين ليس بسبب حداثة موضوعاتها وتركيزها على الظواهر المجتمعية فحسب بل بسبب اسلوب كاتبها الساخر الذي ينتقد فيه الاوضاع الاجتماعية التي نعيشها بكل صراحة وخفة دم...
ويقول عجيب ابو العجايب صاحب المدونة انها:
" وليدة الاحداث والصفعات التي نتلقاها يوميا من المجتمع وهي اضاءة لحس المسؤولية لدي كل منا تجاه مجتمعه بقالب هزلي ساخر نرسم البسمة على وجوهكم من خلال عرض مواقف الحياة بطريقة طريفة، اتمني من الجميع النصح لي ان اخطات ولا تحرمونا من مداخلاتكم القيمة.عجيب أبو العجايب"
وداخل المدونة تشاهد عدة موضوعات ننشر منها:

تصادفني في الحياة اليومية الكثير من المواقف التي ترفع الضغط والتي تدل على تخلف متأصل لدى بعض الناس ، أذكر منها على سبيل المثال:من انشر ولك الأجر إلى انشر يا حقير أو مثل تفاصيل التفاصيل أو مثل أسوأ مستشفى في العالم أو مثل البضاعة التالفة

عندما تصادفني مثل هذه المواقف تراودني فكرة مجنونة تقول بأن الأرض ليست المكان المناسب لأعيش فيه ، ربما علي التوجه إلى كوكب آخر أو ربما علي العيش في القمر حتى أنظر إلى البشر ومفارقاتهم المضحكة المبكية

المشكلة أن الأخ اليمني الذي يملك القمر رفض بيعي أي قطعة على القمر بحجة أن الأراضي نفدت ، ولكنه وعدني بأن هناك ستكون توسعة في القمر وأنه سيسجل اسمي في قائمة الانتظار

شكرت الأخ اليمني على كرمه و طلبت إليه أن يحجز لي قطعة أرض في الجانب المظلم من القمر

فقال لي لا تقلق نظللك القمر كله علشانك

و خلال بحثي في الإنترنت وجدت أن هناك شخص أمريكي اسمه دينيس هوب يدعي بأنه يمتلك الأراضي الموجودة على القمر ، بل إنه يعرض ما مساحته 4 آلاف متر مربع بسعر 45 دولار (يا بلاش!!)

وعندما اتصلت باليمني وواجهته بإدعاء دينيس هوب أجابني اليميني: دينيس هوب هذا في القمر مثل جورج بوش عندكم في الأرض ، دينيس هوب يشتهي أن يسرق الأراضي مني بالقوة

بعدها توصلت لحقيقة أن البشر كلما تدخلوا في شيء أفسدوه ، حتى القمر لم يسلم من شرهم

أصبت بإحباط شديد لأني فشلت في إيجاد ملاذ أمن لي من المواقف المليئة بالتخلف ، ولكن بعد تفكير بسيط حمدت الله أني لم أتسرع في قراري وانتقلت للقمر وإلا ماذا سيحصل لي في النهاية الشهر عندما يصبح القمر هلالاً.
ويختتم عجيب ابو العجايب في كل تدوينة بعبارة يقول فيها:
مدونة عجائب اجتماعية هي مدونة ساخرة لذا أرجو من الجميع تقبل ما يكتب فيها برحابة صدر ورح رياضية. كما أنوه أن الأدب الساخر يعتمد على المبالغة ، لذا أرجو من القراء التنبه لهذه النقطة خلال قراءتهم...
___________________________________________________________________________
يا رب يكون اول عدد نال اعجابكم ومنتظرة الردود

عيد سعيد

2008-12-12T01:20:00.000-08:00

كل سنة وانتم طيبين ويا رب يكون عيد اضحي سعيد عليكم معلش جت متاخر بس الواحد كان مشغول اوي مش عارف ياكل لحمة والا لحمة ولا لحمة
انا حاولت اني اعمل سكان للصفحات بس بايني مش عارفة وبالتالي مش هقدر اوريكوا المواضيع غير اني اعملها كوبي بيست
ان شاء الله البوست الجاي هيبقي فيه العدد الاول
سلااااااااااااااااااااااااااااااام

2008-11-30T18:30:00.000-08:00

سلام عليكم يا شباب المدونخانة
بما اني لسة في بداية الطريق التدويني والصحفي اردت ان اعرض لكم نماذج من مواضيع المدونخانة واهو منها تعرفوا ايه الحكاية ومنها تتشجعوا انكم تشتروا الجرنال واهو نبقي زودنا المبيعات وانتو عارفين حاجة اختكم للزيادة دي يمكن ساعتها يحنو عليا ويدوني اول مرتب لما يعرفوا اني زودت المبيعات
اول مرة تتطلع فيها المدونخانة كان فيها مدونتين
لماضة وعجايب اجتماعية ومقدمة كنت كاتباها عشان نعرف القراء ايه موضوع المدونخانة ده وايه حكايته
انا هجيب المواضيع مكتوبة وادعولي اعرف بعد كده اعملها scan
لحسن لسة الموضوع ملعبك معايا حبيتين
يلا سلاااااااااااااام

البداية

2008-11-29T00:13:00.000-08:00

السلام عليكم ورحمة الله وبركاته
اهلا بك يا زائر المدونخانة
حللت اهلا ونزلت سهلا
دي يمكن اول مرة تشوف مدونتي بس لعلمك المدونة دي هتشوف فيها كل المدونات ازاي
هو انت هتسرقي المدونات والا ايه
طبعا لا
اصل الحكاية وما فيها
اني ببدأ حياتي الصحفية والحمد لله ربنا وفقني وقدرت الاقي حد يقدر شغلي ويخصصلي نص صفحة بحالها
في ملحق "تيلي بيزنس" اللي بيصدر كل خميس مع جرنال العالم اليوم
يا فرحتيىىىىىىىىىى
طب واحنا مالنا بكل ده؟؟؟
مالكم ازاي
ما هو نص الصفحة ده هيكون عنكم
عن المدونين عن عالم المدونات
هنعرض فيه
كل حاجة واي حاجة خاصة بالمدونين حياتهم ومدوناتهم وازاي بدأوا يكتبوا
وايه المشاكل اللي واجههوها مع اول يوم تدوين
نفسي بجد اعبر عنكم
وعن جيلنا من الشباب
اللي لقا فرصة التعبير عن نفسة في المدونات
يلا كفاية كدة عشان مطولش عليكم
وان شاء الله ابقي افيدكم باخر التطورات