الاثنين، 16 فبراير 2009

حتى بعد كل ده



دايما كنت بقول ان استاذ شريف الله يرحمه علمني وعمل معايا حاجات كتيرر اوي بس اللى مكنتش اعرفه ان بعد وفاته هيستمر جميله معايا باشكل ده
انا اول مرة يكون عدد التعليقات كبير اكتر من اي بوست وده كان البوست اللى فات واللى كان عشانه كمان ناس جديدة دخلت المدونة لاول مرة وده برضه من موضوعه كمان ناس كتير بقت متابعه الصفحة وبكم يقولولي رايهم فيها من بعد الموضوع ذاته
سبحان الله
مش بقولكم بجد
الراجل ده جمايله عليا ما بتنتهيش
ربنا يرحمك يا استاذ شريف
ويكرمك على كل اللى عملته معاناف الجرنال ومعايا بالخصوص
------------------------------------
نيجي بقا لموضوع تاني وهو ان لغة المدونات عاوزين نعمل موضوع عن اللغة دي
وازاي بقا للمدونات لغة خاصة بيها
بيقدروا يفهموا بعض من خلالها
عاوزاكم تقولوا تعليكم ايه عن لغة المدونات ومين شايف ان العامية افضل من الفصحى في الكتابة وايه رايكم في المدونات اللى بتكتب بالفرانكو اراب اللى هو عربي بحروف انجليزي وارقام
مستنية رايكم..........وشكرا لكل اللى شرفني بالزيارة

هناك 25 تعليقًا:

محمد حمدي يقول...

لكل مهنه مصطلحات خاصة بها . فى عالم التدوين هناك بعض المصطلحات المتعارف عليها زى (بوست)و (كومنت) و (ممودريشن) ... الخ رايى الشخصى ان العاميه مش فارقه عن الفصحى المهم ان كل واحد يوصل فكرته بالطريقه الامثل اما الفرانكو اراب انا ضده على طول الخط لانه اسلوب هجين فى الكتابه وصعب فى القراءه

تحياتى

مسدس صغير يقول...

اولا : الله يرحم استاذ شريف
ثانيا : بالنسبة لموضوع اللغة التدوينية الجديدة انا بقول ان كل مدونة لازم يبقى ليها لغتها المناسبة يعنى مثلا مدونة بتتكلم عن التاريخ أو اى مجال علمى بحت انا ارفض انها تستخدم اللغة الفرانكو اراب اللى انتى بتقولى عليها
اما مثلا لو مدونة شبابية أو ساخرة أو كوميدية او او . ممكن تكون باللغة الفرانكو اراب بس ده ميمنعش انها تكون باللغة العربية الفصحى طبعا .. وده من وجهة نظرى افضل فى كل الاحيان للحفاظ على لغتنا الجميلة على الرغم من انى مدونتى مش باللغة العربية الفصحى ..
اشكرك على الموضوع الهايل والبوست الاهيل..هههههههه

Lady E يقول...

بجد موضوع مهم جدا يا سومة

فاصل ونواصل

بسمـــة مســـــلّم يقول...

السلام عليكم ازيك يا سومة انا اول مرة ازورك بس مش الاخيرة اولا البقاءلله بجد موضوعك حلو بس رأيى ان اللغة العربية العامية او الفصحى اكيد احلى وانتى صحفية وعارفة ان من ضمن حروب السيطرة الدولية الان نشر اللغة علشان كده لازم على قد ما نقدر نحافظ ونتمسك بلغتنا اوى عسى الا ننقرض هههههه وعالعموم كل واحد ليه افيه فى كلامه ودى اجمل حاجه ربنا خلقنا بيها الاختلاف اكيييييد منتظرة تعلييقك فى مدونتى والدعوة عامة للجميع

safa7_karmooz يقول...

فى الاول رحمة الله على الاستاذ شريف ...وربنا يدخله الجنة ان شاء الله ------------

تانى حاجه فيه زى اسطمبة بقت عند اغلب المدونين جت عليهم فترة فى الكومنت فى الاخر بيكتبوا "تحياتى"

حتى اللى مكنوش بيكتبوها بقوا يكتبوها

معرفش ليه :D

اسماء يقول...

شكرا ليكم كلكم وبجد موضوع الكلمات الي بقت خاصة بالمدونين موضوع بقا كبير جدا
ونفسنا نكلم عنه من زمان
يا ريت الكل يشارك ويقولنا رايه
وشكرا ليك يا محمد حمدي، مسدس، ليدي، بسمة وسفاح كرموز

adel يقول...

لا انا شايف حسب الموضوع اللغة بتفرض نفسها

يعني في ناس بتكتب في كذا مجال مش مجرد مثلا قصص بس او شعر بس

انا بكتب مقالات عامية و شعر فصحي و ساعات شعر عامي و اغاني

كل موضوع و ليه مصطلحاته

Unknown يقول...

السلام عليكم
اولا الله يرحمه يارب رحمة واسعه هو وموتانا
اما عن لغة المدونين فاعتقد اننا كلنا بتكتب بالطريقة اللى بنشوفها مناسبة اكتر واقرب للفهم
ايهما افضل انا بحب اللغة العربية جدا لكن صعب اوى ان المواطن العادى يستوعب كل كلماتها لان الاعلام والشارع
بيستخدموا العامية اكتر

د. ياسر عمر عبد الفتاح يقول...

الله يرحم استاذ شريف

أما عن لغة المدونات ففى البداية نشوف الإسم
هيه مش لغة مدونات قد ما هيه لغة انترنت بصفة عامة . .يعنى لغة شات ولغة منتديات ولغة فيس بوك

هيه اللغة واحدة فى كل ده

بالنسبة للعامية والفصحى
حقيقى أنا بتمنى إننا كلنا نكتب بالفصحى لأنها لغتنا الأصلية واللى ملهوش خير فى لغته ملهوش خير فى أى لغة تانية
أما العامية فلغة سهلة بعدياً عن زخارف اللغة العربية وقواعدها التى تبدوا فى كثير من الأحيان جامدة صلبة صلدة.

طيب والحل ..؟؟
الحل من وجة نظرى الشخصية
إننا نعمل خليط كده متجانس
يعنى منبعدش عن الفصحى تماماً ونخليها برونقها وأرستقراطيتها وبهوها وبرضه منخليهاش مشهد من مشاهد مسرحيات شكسبير علشان هتبقى حاجة دمها تقيل ومكلكعة

كمان فيه حاجة لازم نتفق عليها
فيه ناس بيسموا الإبتذال لغة والوقاحة وقلة الأدب إتجاه والشتيمة شجاعة وكله ممكن يندرج تحت اللغة العامية وده مش صحيح خالص

ولازم يبقى فى حركة تصحيحية من أرباب الأخلاق والفكر السليم لتنقية لغة المدونات من الكلام ده كله

أسف على الرغىىىىىىى الكثييييييير

الحرامي يقول...

اسماء
صحيح ربنا يرحمه
وفكرة لغة المدونات
مش مجرد لغه وبس
لا دا اسلوب
بحس ان الناس هنا كلهم اخوات واخدين قوي علي بعض
وبيحبو بعض جداا
واللي يغيب بيسألو عليه
حقيقي عالم جميل

اسماء يقول...

شكرا لكل اللى شرفونا بالزيارة
وعاوزة اقولكم ان دلوقتي بقا معظم المدونين بيكلموا لغة خاصة بيهم مثلا كلمة بوستات محدش يعرفها غير بلوجراوى اصيل ههههههههه
حتى بلوجراوي دي مهي برضه لغة تدوين يعني الموضوع بقا عامل زي الوظيفة بتغلب ع الواحد وبتاثر عليه مش كده برضه يا بلوجراوية

Lady E يقول...

بصي يا سومة

بالنوسبة لاستخدام الفصحى احسن ولا العامية ده بيتوقف على مهارة الشخص ذات نفسياته في توصيل افكاره سواء بالفصحى او بالعامية
يعني ساعات تقراي بالفصحى وتلاقي كلام جميل جدا ومرتب ويشجع على القراءة
ولما نفس ذات الكاتب يكتب بالعامية تلاقي كلام مش فاهمه منه حاجة

عن نفسي بكتب بالعامية لأني بحس انها بتوصل افكاري اسهل واسرع
وبالنوسبة للفرانكو اراب فأنا بكرة الطريقه دي في الكتابة ومش شايفة انها طريقة مميزة بل بالعكس طريقة تلخبط القارئ

hasona يقول...

السلام عليكم
رحمة الله للأستاذ / شريف
وربنا يتغمده برحمته ويحشره مع النبين والصديقين والشهداء
ويرحم أموات المسملين ويرحمنا اذا سرنا الي ما ساروا اليه
،،،،

احنا بنعتبر المدونات تعبير حي وصادق عن المجتمع وما فيه
المفروض لغتها تكون من نبض المجتمع
سواء العامية العليا
أو الفصحي الجميلة

،،،
أما الفرانكو آراب لا أحبذ استخدامه
لأنه بيضيع حاجات كثير
من ثقافتنا ولغتنا وما تتضمنه من جمال

تحياتي

Hossam يقول...

heyyyyyyyyy Mrs.Asmaa
How r u?miss to u sooooo much
بالنسبة لموضوعك الاول البقاء لله
ثاينا انا شايف ان اللغةمش بس مهمة عشان اللى بيقرا يفهم ولكن مهمة للى بيكتب لانه ممكن يكتب عربى فصحة بس ميبقاش حلو او يكتب انجليزى ويبقى كلامة مش مقنع
انا شايف ان الواحد لو كتب باى لغة سواء عربى فصحة او عامى او حتى عربيزى دى مش مشلكة المهم ينقل اللى جواة بصدق
تحياتى صديقتى
سلام

Unknown يقول...

العامية ظريفة بس استخدامها كتير بيقتل الفصحى ودة مش مطلوب اعتقد لغتى هى هويتى او الحاجة الوحيدة اللى فاضلة من هويتى.....الفرانكو اراب مع احترامى لمستخدميه انا شايفة انه شىء مشوه مسخ مش لغة

غير معرف يقول...

بصي يا اسماءانا شايف ان كل واحد حر يكتب بالغةاللي هوعايزها لأن دي مدونته وهوحر فيها وان كنت بالطبع افضل استخدام اللغةالعربية
اما لغة الفرانكو اراب فدي صراحةانا بتخنق منها قوي ومش بعرف اقراها في احيان كتير
لك خالص ودي
- اه صحيح هو موضوع صفاء هينزل امتى
ياريت تبلغيني
لك كل التحية

غير معرف يقول...

رحم الله استاذ شريف وتجاوز عنه وادخله فسيح جناته
ففضله علي انا ايضا

Hossam يقول...

Hello Mrs.Asmaa
ايه الاخبار..كان نفسى اقرا موضوع جديد
تحياتى صديقتى
سلام

Dr.Mohammed Gohary يقول...

مدونتك مش اللي تتشاف بسرعة أستاذة أسماء

لااااااااااااا

دي عاوزة قعدة

هزورها وقت تاااااااااني شووووووور


تحياتي

وسعدت بالوقت الجميل دا

تصبحي على خير

صفــــاء يقول...

.
يا قمر العدد وصلنى وشوفت الموضوع
بجد يا اسماء جميل ولذيذ زيك مش عارفه اشكرك ازاى يا قمر
وأسلوبه وعنوانه حلو اوى
شكرا يا جميله على تعبك معايا
.

http://kasperb4.blogspot.com/ يقول...

الله يرحم الأستاذ شريف ويجازيه خير عن كل اللي عمله
-----
بالنسبة للغة المستخدمة في التدوين
انا كنت بفكر ف الحكاية دي مع كل بوست كنت بكتبه ياترى اكتب عامي ولا فصحى
بصراحة فضلت شوية ف الأول احاول احافظ ع الفصحى
وبعدين قلت لنفسي انا هكتب بالطريقة اللي احس انها تعبر عن المعنى اكتر

وغالبا بقيت اكتب بالعامية

انا مبحبش الفرانكو
:((

------
مبسوط اني اتعرفت ع مدونتك وان شاء الله اتابعها اول بأول
ونورتيني يا أسماء

دعاء مواجهات يقول...

مبدئيا الموضوع مش حكاية لغة منفصلة بقدر ما هو اسلوب كل واحد بيختارة للتواصل

كل واحد بيكتب الى جواة زى ما هو بدون تجميل وبالتالى المتلقى بيقراة زى ماهو مش محتاجين لقواعد او اسس نمشى عليها وننظم بيها قواعد للكتابة

فقط افتح الكمبيوتر واكتب ما يحلو لك بأى أسلوب شئ وبأى لغة فضلت

دى بترجع لشخصية كل واحد

مع الاخذ ف الاعتبار عنصريتى الشديدة للغلة العربية فى كتابتى

ودا بردو ميمنعش انى احيان كتير بضيف لية نسبة عامية تيسر وتقرب من القارئ

انما الفرانكو مش بحبة خاالص فى التدوين هو ممكن اة ينفع فى مسيج موبايل انما اكتر من كدة لا صراحة مستحملش
==================

كنت عاوزة اعرف هى المجلة ورقية ولا ع النت ولا اية بالظبط

احب اتابع واشارك

بيس..

Unknown يقول...

عايز اقولك على حاجة مهمة جداً عرفتها مع بداية دخولى لعالم التدوين والصحافة

مش مهم التعليقات قد ما المحتوى مهم...
زى منتى بتكتبى فى الجرنان ... مش مهم مين اللى بيقرا مقالك

اهم حاجة توصلى فكرتك
توصلى للناس كلامك بإحساس من قلمك

والكومينتات فايدتها انها بتعمل تطوير للذات ، إذا كان من الناحية الفكرية او من الناحية العقلية

المدونة اكثر من جميلة ووفقك الله

اسماء يقول...

سلام عليكم
معلش انا اسفة ع التاخير ف الرد
دعاء مواجهات
المدونخانة هي صفحة بتصدر كل الخميس
مع ملحق تيلي بيزنس
اللى بيطلع مع جرنال العالم اليوم كل خميس
يعني ورقية
-------------------
اسلام معاك ف الكلام بس برضه الواحد بيحب ان موضوعاته تتقري ما تعرفش انا ببقا فرحانة اد ايه لم اعرف ان حد قرا الصفحة ببقي مبسوطة الغاية طبعا ان الواحد يعبر عن نفسه بس بيفرح برضه من الاهتمام والمتابعة

ayman nasrallah يقول...

انا شايف العامية ممكن تكون انسب لكن انا موافق على اى لغة تختاروها الا الفرانكو اراب دى