الأحد، 17 مايو 2009

المدونخانة تطلب التعاون


من فترة كده قريت عن امكانية انك تتربح من المدونة
والله يا جماعة لا اخفيكم سرا اني مكنتش اعرف ايتها حاجة عن الموضوع ده وحسيت ان ممكن اننا نعمل موضوع عن كيفية التربح من مدونتك في الصفحة
فايه رايكم اننا نفتح البوست لاي حد ممكن يقول كيفية التربح ونحاول نجمع معلومات كتير عم مثلا جوجل ادسينس وعن اي طريقة تانية ممكن من خلالها انك تكسب وانت بتدون
وسمحولي اني اقول المعلومات اللى قدرت اتوصلها لحد الان في الموضوع ده
خدمة جوجل ادسنس وهي خدمة مقدمة من جوجل وبتيح انك تحط اعلان جوا المدونة ولما الناس تدخل عندك ويدوسوا على ايقونة الاعلان دي بتكسب فلوس ساعتها بس انا ليسه معرفش الفلوس دي بتوصلك ازاى؟!!
فيه مواقع بتقول انك بتكسب عدد من السنتات واللى بتتجمع وممكن توصلك على حسابك البنكي الشخصي
وفيه ناس قالت ان الموضوع ده مبيجيش منه نتيجة حقيقية
على فكرة فيه مدونات زي مدونة "اربح" اصحابها مخصصينها لشرح كيفية التعامل مع الانترنت والتربح منه والمدونات دي بيكون فيها اعلانات كتير
يعني ده كده معلومة في السريع عن الموضوع ده فايه رايكم؟؟

هناك 16 تعليقًا:

karim يقول...

واللة يا اسماء هانم يارييت دة احنا نبقى تمام التمام لو عرفتى اى حاجة قوليلنا انتى عارفة الظروف المنيلة اللى احنا فيها, تحياتى

اسماء يقول...

مهو بحاول اهو بس عايزة مساعدة اصل الموضوع كبيييييييير
بس ان شاء الله نجيب قراره بقا

Lady E يقول...

والله يا سومة الموضوع ده شاغلني من فترة بس مقدرتش اوصل لنتيجة حقيقية فيه

بس اللي اعرفه ان لازم يكون في حساب بنكي عالنت بتتحول عليه المبالغ دي وبعدين بتوصل لأصحابها عن طريق ويسترن يونيون

كيــــــــــــارا يقول...

سمسمه

موش عارفه بصراحه

اسماء يقول...

lady e
وكيارا
بحاول اوصل لاي معلومات لحد دلوقت وزي ما قلتي يا ليدي انت محتاجة حساب بس هي الفكرة هل الموضوع فعلا له عائد كويس ولا مش مستاهل
يعني هنشوف كده

قلم رصاص يقول...

الموضوع ده نصب وانا جربته من قبل

ولو حد أكد لي دلوقتي اني غلطان وبالفعل الموضوع حقيقي .. هرفض اني ألجأ له عشان حاسس فيه بشبهة حرمانية ..ده بوازع نفسي مني انا مش من حد متخصص ولا حاجة

والله اعلم

واظن ان ده بدعة من المحدثات اللي نهى عنها الاسلام

معلهش دي وجهة نظري المتواضعه أستاذة أسماء .. والله المستعان

اللهم أتنا في الدنيا حسنة وفي الأخرة حسنة وقنا عذاب النار

تقبلي مروري

في حفظ الله

القمر الساهر يقول...

انا كنت سمعت عنها فعلا

ولو انت مدونتك مشهورة وبيدخلها ناس كتير تبقى مربحة على ما اعتقد يعنى

بس للاسف ما اعرفش عنها حاجة بس في مدونين ممكن يفيدونا زي المدون محمد سعيد احجيوج.

ممكن نساله دة رابط مدونته
http://miolog.com/personal/abc-blogging/

FREE SOUL يقول...

موضوع جميل ولذيذ بس قديم شويه
ههههههههه

بصى يا ستى
الاول اعملى ليكى اكونت ع الباى بيلpay bill
كده بقى ليكى اكونت اون لاين يعنى يوزر نايم وباسوورد والكلام اياه ده

بعد كده فيه اكتر من موقع واكتر من حاجه تعمليها وتكسبى منها دولارات وده كله ع النت طبعا
زى مثلا السيرفاى ودى مواقع شبيهه با بحاث التسويق بس ابحاث تسويق عن مواقع يعنى بياخد رايك فى كام موقع كده ويحوللك حفنة دولارات"من اجل حفنة دولارات" هههه
المهم بعد كده علشان تحولى الدولارات دى على الباى بيل لازم يكون عندك رصيد كحد ادنى 50 دولار

المهم ان انا جربت الكلام ده وقعدت انافق فى المواقع اللى انا عمرى ما سمعت عنها ولا اعرف عنها شىء لحد ما كملت الخمسين دولار
وجرى رحت محولهم ع الباى بيل
ومكدبش عليكى يا اسماء هانم الكلام دا كان من حوالى 3 شهور ولحد دلوقتى معرفش ايه هو مصير الخمسن دولار بتاعتى
بس سمعت اشاعات بتقول انه انا بعد ما حولتهم من النت حصل انهيار تام فى السوق الامريكيه وفى بعض الجهات حولتنى مسؤلية الازمه الاقتصاديه اللى مر بيها العالم ولازال.
بس انا من هنا اعلن عدم مسؤليتى
وكتاب الله لسه مشوفت من الخمسين دولار دول حاجه. وحسابى فى الباى بيل لازال صفر لا غير.
ودى كانت حكايتى مع السيرفاى والباى بيل.
وحسبى الله ونعم الوكيل فى الخمسين دولار بتوعى. هههههههههه

akeed يقول...

ياريت نعرف المعلومه عن ذلك و لاكن الهدف الاساسى للمدونة وهو نشر الفكر وليس التربح

سمو الأميرة سارة يقول...

مش عارفة مدى جدوى الادسنس ايه وبتجيب فلوس فعلاً ولا لأ لكن اللي اعرفه ان عيبها اننا مانقدرش نتحكم في محتوى الاعلانات اللي عليها يعني ممكن تلاقي نفسك فجأة بتروجي ع مدونتك لمواقع سيكو سيكو او مواقع بتسب الدين الاسلامي او لاتعترف بوجود الله ودا طبعاً مش حلو نوهائي ..
اللي حصل ليا بقى ان شركات بعتت لي علشان تعمل اعلان في مدونتي بس خفت ارد عليهم لحسن يكون هاكر ولا حاجة

ghoneem يقول...

بعد التحية
أخبار الاعلامية الكبيرة بتاعتنا ايه
انا عرفت من محمد الف مبروك وربنا يوفقك ف امتحاناتك
أما عن موضوع التربح من المدونة انت عارفة طبعا اننا معشر الدكاترة عندنا تخمة من كتر الفلوس انا لما بتيجي سيرة الفلوس قدامي ببقي هرجع فأنا بصراحة مش ههتم بالموضوع ده
يابنتي فلوس ايه انت عارفة انا مرتبي كام؟؟؟؟؟
بلاش بقي احسن هعيط والعياط بعد الترجيع مش كويس
:(
كمان مرة الف مبروك(
تحياتي
بالتوفيق.........

Hossam يقول...

صديقتى اسماء
لذيذ الموضوع وفكرة حلوة اوى
منك بدون وبتفيد الناس وبرده انت كمان بتستفاد
اضفاة جميلة
شكرا عل الموضوع الجميل
تحياتى سدصيقتى واتمنى اشوفك قريب

مصطفى ريان يقول...

اسماء
ياريت لما تعرفي تقوليلي علشان
محتاج فلوس والكتاب خلص على كل اللي معاياوستلفت كمان
تحياتى
لك

إسلام الدسوقى يقول...

السلام عليكم جميعاً
ازيك يا استاذة اسماء
انا كنت عايز اقول حاجه بالنسبه للموضوع ده
اولاً الربح عن طريق الانترنت
وبشكل خاص من المودنات حاجه حقيقية
واعتقد ان شركة بحجم جوجل لما تعمل الموضوع ده يبقي مفيش نصب ولا حاجه زي ما الناس بتقول
علاوة علي اني مجرب الموضوع
والحمد لله بيوصلي منه دخل كويس
اول حاجه جوجل ادسينس
ودي خدمه بتقدمها جوجل عن طريق مشاركه المدونين او اصحاب المواقع في نشر اعلانات جوجل
والحساب فيها بيبقي عن طريق الضغط علي الاعلانات دي من الزوار
وفيه كمان الياهو بابليشر
ودي من اسمها بتقدمها شركه الياهو
وهي تقريباً نفس فكرة جوجل
فيه كمان حاجه اسمها التسويق لحساب شركات تانيه
زي شركة امازون المشهورة
ودي حسابها بيبقي علي حسب عدد الزباين اللي بيشتروا منتجات الشركة من خلال اعلاناتك اللي في المدونة
واخيراُ وبعد جهد كبير
موقع اليوتيوب
اللي بيشارك اعضائه اللي عندهم مشاهدات عاليه علي الفيدوهات بتاعتهم في ارباحه السنوية
لكن انا مقدرش انكر ان فيه ناس كتير بتنصب
عشان كده الافضل اننا نتعامل مع شركات معروفة وليها سمعتها
ومعلومة اخيرة
فيه ناس في اروبا وامريكا بتعمل ارباح من جوجل حوالي 25000 دولار في الشهر
ارجو اني مكونش طولت عليكم
تقبلوا تحياتي
حقودي سابقاً
www.chance4you.blogspot.com

Hossam يقول...

هاى يا اسماء
وحشتينى جدا ايه اخبارك
وفين املوضوع الجديد
تحياتى صديقتى
سلام

Hossam يقول...

اسماء
انتى فينك يبنتى فين الجديد
ارجوكى لازم تبعتيلى رقم تليفونك ضورى
فى اسرع وقت
تحياتى
سلام